مری شاعری مری زندگی مری بزم شعر و سخن میں آ

مری شاعری مری زندگی مری بزم شعر و سخن میں آ

مری بیکلی کی بہار بن مرے اجڑے دل کے چمن میں آ

مری رات کی ہے تو چاندنی مرے دن کی تو ہی تو دھوپ ہے

مرے دل کا تو ہی ہے آسرا مری سانس کی تو تھکن میں آ

مری راہ میں ہیں مصیبتیں مری منزلوں پہ نگاہ ہے

مری الجھنوں کو سنوار دے مرے زخم دل کی چھبن میں آ

ابھی دلدلوں میں سماج ہے ابھی ظالموں ہی کا راج ہے

میں تو رنج و غم کا شکار ہوں مری ہمتوں کی شکن میں آ

مرے لب پہ آج بھی مہر ہے مرا دل تو اب بھی غلام ہے

مری خامشی کی زبان بن مرے جوش دل کی لگن میں آ

ہے عدوئے جاں مرا آسماں یہ زمیں بھی مجھ سے خلاف ہے

مری بدلیوں کو تو چیر دے نیا چاند لے کے گگن میں آ

جو غریب دل کو بڑھا سکے جو گھمنڈ سر کو جھکا سکے

مری آرزوئے نصیب بن مری لیکھنی کے تو فن میں آ

مرے ناوکوں کی ہیں نیتیں مری بحر غم میں وفات ہو

مری ناو موج میں تھام لے مرے ساحلوں کے پھبن میں آ

مری تربتوں میں نہ دم رہا مری حسرتوں میں نہ جان ہے

مرے ہوش کا تو چراغ بن مری روشنی کی کرن میں آ