اب اٹھنا ہی پڑا اس آستاں سے

اب اٹھنا ہی پڑا اس آستاں سے

کہ بحثیں روز کی ہیں پاسباں سے

کہیں گے حشر میں سب اپنی اپنی

سنیں گے سب کی وہ سب کی زباں سے

رہے تو خلق میں آباد اے قبر

مجھے راحت ملی بڑھ کر مکاں سے

جدا ہونا مرے پہلو سے ان کا

نہیں کچھ کم فراق جسم وجاں سے

اگر سچ مچ قیامت ہے کوئی شے

تو بس اٹھے گی وہ کوئے بتاں سے

وہ مئے کش ہوں کہ پیتا ہوں نئی روز

اترتی ہے نئی روز آسماں سے

کیا جرم محبت کا خود اقرار

بنے مجرم ہم آپ اپنی زباں سے

جفائے چرخ کا تربت میں کیا خوف

کہ اب باہر ہوں حدِّ آسماں سے

فہیمؔ اک دن جو کھینچوں گرم آہیں

تو برسوں آگ برسےآسماں سے