محبت غم ہے تو آرام کیا ہے

محبت غم ہے تو آرام کیا ہے

ہمیں آرام سے پھر کام کیا ہے

سمجھ میں دل کی باتیں کچھ نہ آئیں

نہ جانے عشق کا پیغام کیا ہے

محبت ہی محبت ہے زمانہ

محبت خاص ہے تو عام کیا ہے

نگاہوں میں ہے مستی کی حقیقت

تری آنکھوں کے آگے جام کیا ہے

سفر میں زندگی کی منزلیں ہیں

نہیں تو صبح کیا ہے شام کیا ہے

ہر اچھے نام سے ان کو پکارا

خدا معلوم ان کا نام کیا ہے

ذہینؔ ان کے چلے جانے سے پہلے

نہ جانے عشق کا انجام کیا ہے