زور و زر رسم جہاں سے تو ہوا حقدار ہے

زور و زر رسم جہاں سے تو ہوا حقدار ہے

تجھ کو الفت کا کہاں اے بد گہر آزار ہے

اے رقیب روسیہ تو زور سے وارث بنے

کب دیا تو نے ہے دل کیوں دلربا کا یار ہے

اس کی الفت میں کہاں تو نے اٹھایا رنج و غم

جو اٹھائے رنج و غم راحت کا وہ حقدار ہے

جو اٹھائے رنج و غم روئے نہ ہجر یار میں

وہ کرے دعوائے الفت تو بڑا مکار ہے

تو نے کب چلمن پرستی کی ہے بہر دید یار

تو رقیبوں کی جفا کا کب ہوا حقدار ہے

یاس و حسرت کے کہاں دیکھے ہیں تو نے سوز و ساز

تو کہاں جینے سے الفت میں ہوا بیزار ہے

سب مصائب سر پر محسنؔ نے اٹھائے عشق کے

اس لیے معشوق بھی کرنے لگا اب پیار ہے