وہم دوئی مٹا دیا ہم نے

وہم دوئی مٹا دیا ہم نے

رنگ وحدت جما دیا ہم نے

سن کے حلاج جس کو مست ہوئے

وہ ہی افسوں سنا دیا ہم نے

جس کو کہتے تھے لامکاں میں سب

ہر مکاں میں دکھا دیا ہم نے

لا تعین وہ جو کہ تھا مخفی

در تعین بتا دیا ہم نے

جو حقیقت تھی خاص اس دل کی

اس کا پردہ اٹھا دیا ہم نے

جس کو دیکھا نہ تھا پہ سنتے تھے

دل سے دل کو دکھا دیا ہم نے

بے خودی کی شراب کا ساغر

جس نے مانگا پلا دیا ہم نے

خواب غفلت میں جوکہ سوتے تھے

آکے ان کو جگا دیا ہم نے

غیر ہستی جو دل میں آئی تھی

نام اس کا مٹا دیا ہم نے

راز وحدت کا جو کہ تھا مخفی

وہ محقق سنا دیا ہم نے

صید دوئی کے واسطے محسنؔ

تیر وحدت چلا دیا ہم نے