جس نے پی ہے ساقیا تجھ سے محبت کی شراب

جس نے پی ہے ساقیا تجھ سے محبت کی شراب

کرتا ہے بریاں وہ نارِ عشق سے دل کے کباب

روز و شب اختر شماری کرتے ہیں ہم ہجر میں

ماسوا اس کے نہیں دیکھا کوئی ہم نے حساب

ہجر دوزخ وصل جنت عاشقوں کو ہے میاں

ہو مبارک تجھ کو واعظ یہ عذاب اور وہ ثواب

پل صراط عاشقاں وہم دوئی کی راہ ہے

ڈھونڈھتے وحدت کو یہ کثرت میں ہیں والا خطاب

پردہ پوش آئے نظر اعراف عاشق کو یہ ہے

خاص جنت ہی کہیں گردور ہو رخ سے نقاب

نالے میں تاثیر ہو تو بس شفاعت ہو گئی

وصل کے وعدے کا دن عاشق کو ہے روزِ حساب

آہ و نالہ سوز سے غافل نہ ہو اندر طلب

ہے نماز پنج گانہ کا یہی محسنؔ کو باب