بیٹھو سنائیں رسم ورہ عاشقی کی بات

بیٹھو سنائیں رسم ورہ عاشقی کی بات

تم سے بھی کچھ سوا ہے غم زندگی کی بات

اس کے سوا تو کچھ نہ تھا سامان سرخوشی

ساغر کی یاد ذکر مغاں میکشی کی بات

اس کارگاہ شوق میں کیا ذکر سنگ وخشت

لاؤ بنا کے دل تو ہے شیشہ گری کی بات

ہر چند ذکر ساغرومینا چھڑا مگر

عنوان داستاں تھی وہی تشنگی کی بات

ویرانۂ حیات کو گلزار کردیا

تم ہو کہ اس کو کہتے ہو دیوانگی کی بات

ایمن طرازیاں ہیں نہ ہے طور افگنی

کیوں کر رہی ہے دانش نور دشمنی کی بات

کس کام کی رضاؔ یہ زمانہ شناسیاں

خود کو سمجھ سکوں تو ہوئی آگہی کی بات