غیروں پہ کھل نہ جائے کہیں راز دیکھنا

غیروں پہ کھل نہ جائے کہیں راز دیکھنا

میری طرف بھی غمزۂ غماز دیکھنا

اڑتے ہی رنگ رخ مرا نظروں سے تھا نہاں

اس مرغ پر شکستہ کی پرواز دیکھنا

دشنام یار طبع حزیں پر گراں نہیں

اے ہم نفس نزاکت آواز دیکھنا

بدکام کا مآل برا ہے جزا کے بعد

حال سپہر تفرقہ پرواز دیکھنا

کشتہ ہوں اس کی چشم فسو نگر کا اے مسیح

کرنا سمجھ کے دعویٰ اعجاز دیکھنا

میری نگاہ خیرہ دکھاتی ہے غیر کو

بے طاقتی پہ سرزنش ناز دیکھنا

ترک صنم بھی کم نہیں سوز جحیم سے

مومنؔ غم مآل کا آغاز دیکھنا