نہ ہے وہ غیرتِ لیلیٰ نہ ہے وہ یوسفِ ثانی

نہ ہے وہ غیرتِ لیلیٰ نہ ہے وہ یوسفِ ثانی

تصور میں مرے جو کھنچ گئی تصویرِ نورانی

خدا نے کیا بنائی ہے نبی کی شکل نورانی

کہ جس کو دیکھ کر سکتہ میں ہے بہزاد اور مانی

نگاہِ شوق کہتی ہے کہ دیکھوں اور پھر دیکھوں

وہی جلوہ کہ جس جلوہ سے تھی موسیٰ کو حیرانی

خدا بھی ہے خدا ہی اور محمد بھی محمد ہیں

نہ اس کا ہے کوئی ہمسر نہ ان کا ہے کوئی ثانی

نہیں ہوتا قیامت میں مجھے باور نہیں ہوتا

محمد اور دیکھیں اپنی امت کی پریشانی

خدارا یا محمد مصطفیٰ بگڑی بنا دیجے

جو تم چاہو تو ہو جائے ابھی مشکل کی آسانی

غمِ ہر دو جہاں سے چھوٹ جائے ساقیٔ کوثر

خدارا شادؔ کو بھی ہو عطا اک جامِ عرفانی