دل کو کبھی نہ مائلِ زلفِ دوتا کرے

دل کو کبھی نہ مائلِ زلفِ دوتا کرے

انسان اپنے سر پہ نہ سودا لیا کرے

انسان کس طرح سے صفاتِ خدا کرے

بلبل کی کیا مجال جو گل کی ثنا کرے

حاضر جگر ہے شوق سے صاحب لگاؤ تیر

لیکن یہ شرط ہے نہ نشانہ خطا کرے

دن رات جس کی آنکھوں میں تیرا جمال ہو

تو ہی بتا وہ دیکھ کے حوروں کو کیا کرے

ہے سنگ دل غضب کے بتانِ ستم شعار

کافر کا دل بھی ان پہ نہ آئے خدا کرے

محرم کا بند کھولنا چاہا تو بولے وہ

عقدہ یہ وہ نہیں جو ہر اک سے کھلا کرے

شوقِ لقائے حق میں سر طور جب کلیم

پہنچا تو چاہا اس نے کہ کچھ التجا کرے

ناگاہ جبرئیلِ امیں کو ہوا خطاب

موسیٰ سے کہہ دو دیدۂ حق بیں کو وا کرے

غش آ گیا جو دیکھا تجلیِ طور کو

انسان اپنی حد سے سوا حوصلہ کرے