جو چھپنا ہی تھا راز افشا کیا کیوں

جو چھپنا ہی تھا راز افشا کیا کیوں

کہا ’’نحن اقرب‘‘ تو کہہ کر چھپا کیوں

الف تیری وحدانیت کو تھا کافی

تو پھر لام میں میم بن کر رہا کیوں

الف پردۂ میم میں مجھ سے مل جا

جو تو ہے وہ میں ہوں پھر تو سے جدا کیوں

تری ذات لاریب ہے اور منزہ

تو اس جسمِ خاکی میں آکر بسا کیوں

خودی آکے وحدت سے کثرت سے بولی

انا الحق پہ منصور کو دی سزا کیوں

خدا سے ہے ملنے کا گر شوق انجمؔ

مٹا دے خودی کو یہ جھگڑا رکھا کیوں