قرآن میں خود جو خالقِ اکبر ثنا کرے

قرآن میں خود جو خالقِ اکبر ثنا کرے

مدح رسولِ پاک بشر کیا بھلا کرے

قاتل جو ایک وار میں تو فیصلہ کرے

بسمل دہانِ زخم سے تیری ثنا کرے

حیرت ہو خود تمہیں کہ وہ یکتائی کیا ہوئی

تم سے مقابلہ جو کبھی آئینہ کرے

کیا حاملانِ عرش کو نوٹس پہنچ گیا

پازیب کو جو حکم ہو محشر بپا کرے

سو بار قتل ہوں تو مزا زندگی کا کیا

مرتا رہوں جو عمر مری جاں وفا کرے

ذروں میں جا ملے گی درِ بو تراب کے

برباد میری خاک جو بادِ صبا کرے

کہتے ہیں مہندی مل کے وہ بے داغ ہم چھٹے

ہم کیا کریں جو خونِ تمنا حنا کرے

مشہور ہے کلام ہے انساں کی زندگی

زندہ ہو دل یہ بزم جو قائم ہوا کرے

اپنا شباب بھی پلٹ آئے تو کیا عجب

ہر دم جو حسن و عشق کا چرچا رہا کرے

اس بے وفا پہ دیتے ہیں جاں اس امید پر

جب زندگی وفا نہ کرے تب وفا کرے

مدفن رواق پاک میں اپنا بنے محبؔ

الفت جو میری خاک سے خاکِ شفا کرے