mujhe shauq-e-did mein pa ke gum wo naqab ulaT ke jo aa gae

mujhe shauq-e-dīd meñ pā ke gum vo naqāb ulaT ke jo aa ga.e

nazar aur kuchh bhī na aa sakā vo merī nazar meñ samā ga.e

kahāñ apnī aisī talāsh thī kahāñ apnī aisī thī justujū

ye tere karam hī kī baat hai terī bārgāh meñ aa ga.e

mujhe tiira rāhoñ kā ġham nahīñ maiñ guzar hī jā.ūñgā ham-nashīñ

vo dikhā ke mujh ko ruḳh-e-mubī۔n mere dil meñ sham.a jalā ga.e

nahīñ be-ḳhabar vo kisī tarah use har tarah kā shu.ūr hai

jise apnī chashm-e-karam se vo kabhī ek jaam pilā ga.e

mujhe aazmā ke to dekh leñ ġham-e-do-jahāñ kā amiin huuñ

ye samajh liyā hai kisī ne kyuuñ ki jahāñ se ahl-e-vafā ga.e

tere hijr meñ hai vo haal ab ki bayāñ hai jis kā muhāl ab

liyā pūchh jis ne bhī haal jab to kuchh ashk aañkh meñ aa ga.e

vahī bazm-e-aish-o-nashāt hai vahī naġhma hai vahī saaz hai

nahīñ phir bhī dil ko sukūn kuchh vo payām aisā sunā ga.e

yahī fikr hai mujhe har ghaḌī na lagā deñ aag chaman ko bhī

jo sharāre barq ke bāġhbāñ merā āshiyāna jalā ga.e

tere ġham kī harsat-o-ārzū hai zabān-e-ishq meñ zindagī

jinheñ mil gayā hai ye mudda.ā vo maqām-e-zīst bhī pā ga.e

nahīñ kuchh ye mujh hī pe munhasir hai yahī jahāñ kī zabān par

vahī zarre aaj haiñ zau-fishāñ terī rah-guzar meñ jo aa ga.e

ye jo kaif-e-bāda ġhazal meñ hai use kyuuñ kamāl-e-suḳhan kahūñ

ye to 'sādiq' us kā surūr hai jo nigāh se vo pilā ga.e

mujhe shauq-e-did mein pa ke gum wo naqab ulaT ke jo aa gae

nazar aur kuchh bhi na aa saka wo meri nazar mein sama gae

kahan apni aisi talash thi kahan apni aisi thi justuju

ye tere karam hi ki baat hai teri bargah mein aa gae

mujhe tera rahon ka gham nahin main guzar hi jaunga ham-nashin

wo dikha ke mujh ko ruKH-e-mubi۔n mere dil mein shama jala gae

nahin be-KHabar wo kisi tarah use har tarah ka shuur hai

jise apni chashm-e-karam se wo kabhi ek jam pila gae

mujhe aazma ke to dekh len gham-e-do-jahan ka amin hun

ye samajh liya hai kisi ne kyun ki jahan se ahl-e-wafa gae

tere hijr mein hai wo haal ab ki bayan hai jis ka muhaal ab

liya puchh jis ne bhi haal jab to kuchh ashk aankh mein aa gae

wahi bazm-e-aish-o-nashat hai wahi naghma hai wahi saz hai

nahin phir bhi dil ko sukun kuchh wo payam aisa suna gae

yahi fikr hai mujhe har ghaDi na laga den aag chaman ko bhi

jo sharare barq ke baghban mera aashiyana jala gae

tere gham ki harsat-o-arzu hai zaban-e-ishq mein zindagi

jinhen mil gaya hai ye muddaa wo maqam-e-zist bhi pa gae

nahin kuchh ye mujh hi pe munhasir hai yahi jahan ki zaban par

wahi zarre aaj hain zau-fishan teri rah-guzar mein jo aa gae

ye jo kaif-e-baada ghazal mein hai use kyun kamal-e-suKHan kahun

ye to 'sadiq' us ka surur hai jo nigah se wo pila gae