نظر کی چوٹ، دل کا درد ، بیتابی رگِ جاں کی

نظر کی چوٹ، دل کا درد ، بیتابی رگِ جاں کی

یہ پہلی قسط ہے ترتیب غم میں میرے ارماں کی

نہ وہ ہیں درد کے تیور نہ بے چینی دل و جاں کی

اجل کیا آئی آنکھیں کھل گئیں بیمارِ ہجراں کی

رگِ ہر گل سے میرے خون کے قطرے ٹپکتے ہوں

ذرا اے یاس وہ تصویر لا دینا گلستاں کی

عدم سے ہست ہونا ہست سے پھر نیست ہوجانا

یہی دو کروٹیں ہیں خواب کے عالم میں انساں کی

ارے او صبحِ عشرت کی بہاریں دیکھنے والے

اداسی بھی ذرا اب دیکھ لے شامِ گریباں کی

بہت مشہور ہے اے موت تیرا فیض عالم میں

مگر مشکل ہماری آج تک تونے نہ آساں کی

اسی کا نام آزادی ہے توہم اس سے باز آئے

کہ جو صورت ہے اب گھر کی وہی صورت ہے زنداں کی

محبت کے جہاں کا وہم پر سب خار خانہ تھا

حقیقت کھل گئی آخر دل خوننا بہ افشاں کی

سمجھتے ہو جسے مختارؔ تم اپنی غزل گوئی

ہے شکل ظاہری یہ اصل میں جذبات پنہاں کی