zor dikhlata hai kya-kya zoaf jism-e-zar ka

zor dikhlātā hai kyā-kyā zo.af jism-e-zār kā

rañg uḌne ko tarastā hai mirī ruḳhsār kā

diid ke qābil hai joban sabz-o-rukHsār kā

mo.ajiza hai sabz honā aag par gulzār kā

rāt-din yūñhī paḌegī 'āshiqoñ kī gar nigāh

band ho jāygā rauzan ḳhud-baḳhud dīvār kā

bā'is-e-zīnat huā soz-e-javānī dahr meñ

dāġh-e-saudā ban gayā turra mirī dastār kā

duḳht-e-raz ke rū-ba-rū kyuuñ le chalā saaqī mujhe

ḳhuun hogā gardan-e-mīnā par istiġhfār kā

dahr meñ zālim hamesha rahte haiñ shādī-nasīb

kam nahīñ hotā kabhī ḳhanda-lab sūfār kā

kyā nasīm-e-āh bulbul ne khilāyā hai ise

daaġh kī detā hai bū har gul mere gulzār kā

shaiḳh kā ashk-e-riyā.ī kufr se ḳhālī nahīñ

rishta-e-tasbīh-e-sulaimānī meñ hai zunnār kā

shart-e-ulfat hai yahī 'taslīm' bā'd-e-hashr bhī

haath se dāman na chhūTe ahmad-e-muḳhtār kā

zor dikhlata hai kya-kya zoaf jism-e-zar ka

rang uDne ko tarasta hai meri ruKHsar ka

did ke qabil hai joban sabz-o-rukHsar ka

moajiza hai sabz hona aag par gulzar ka

raat-din yunhi paDegi 'ashiqon ki gar nigah

band ho jayga rauzan KHud-baKHud diwar ka

ba'is-e-zinat hua soz-e-jawani dahr mein

dagh-e-sauda ban gaya turra meri dastar ka

duKHt-e-raz ke ru-ba-ru kyun le chala saqi mujhe

KHun hoga gardan-e-mina par istighfar ka

dahr mein zalim hamesha rahte hain shadi-nasib

kam nahin hota kabhi KHanda-lab sufar ka

kya nasim-e-ah bulbul ne khilaya hai ise

dagh ki deta hai bu har gul mere gulzar ka

shaiKH ka ashk-e-riyai kufr se KHali nahin

rishta-e-tasbih-e-sulaimani mein hai zunnar ka

shart-e-ulfat hai yahi 'taslim' ba'd-e-hashr bhi

hath se daman na chhuTe ahmad-e-muKHtar ka