مت بھول دنیا میں دلا یہ شان و شوکت چار دن

مت بھول دنیا میں دلا یہ شان و شوکت چار دن

آخر کو تو ہوگی فنا یہ مال و دولت چار دن

سب پر عیاں ہے ہر زماں کہ بدلتا ہے رنگ جہاں

گر عیش ہے اک دن یہاں پھر رنج غربت چار دن

ہو گوشۂ تن سے بھلا جس دم یہ مرغ جاں ہوا

ہو کون ہمراہی ترا یہ ساتھ و الفت چار دن

کر ہر نفس یاد ہری حاصل ہو جس سے بہتری

سامان کر عقبیٰ کا بھی یہ جان فرصت چار دن

یہ جگنؔ ناتھ کہے سخن کر فضل اے شاہ زمن

کر دور سب رنج و محن حاصل ہو عشرت چار دن