ہوا جب سے ہم کو صنم سے تعلق

ہوا جب سے ہم کو صنم سے تعلق

رہا کچھ نہ دیر و حرم سے تعلق

خوشی رنج راحت محبت عداوت

یہ جھگڑے ہیں سب ایک دم سے تعلق

ہوئی ترک جب سے ملاقات ان سے

خوشی سے علاقہ نہ غم سے تعلق

کرے گا وہ ہی وصف ان کی کمر کا

کہ رکھتا ہو جو کچھ عدم سے تعلق

تمنائے دل میری سن کر وہ بولے

بھلا ایسی باتوں سے ہم سے تعلق

رہا ہم کو مہر و وفا سے علاقہ

اور ان کو جفا وستم سے تعلق

بس اب ہم ہیں اور کوئے جاناں ہے واعظ

ہمیں تیرے باغِ ارم سے تعلق

محبت میں پایا نہ آرام اکِ دم

رہا عمر بھر ہم کو غم سے تعلق

میں کیا حال اپنا لکھوں اس کو قاصد

نہیں راز دل کو قلم سے تعلق

عجب تھے وہ دن اور وہ راتیں مزیبؔ

کہ تھاجن دنوں سے ہم سے تعلق