muzda-e-wasl bahut din se roz suna karte hain

muzda-e-vasl bahut din se roz sunā karte haiñ

sālahā guzre ki ham roz ginā karte haiñ

aamad aamad kī ḳhabar jab se sunā karte haiñ

kaun din hai ki nahīñ raah takā karte haiñ

nāma-bar sach kaho ve naama ko kyā karte haiñ

khol kar paḌhte haiñ yā pheñk diyā karte haiñ

ek is bazm meñ ham misl-e-charāġh-e-saharī

ātish-e-hijr se har raat jalā karte haiñ

yā-rab is 'ishq meñ badnām kahāñ tak hoñge

ek 'ālam haiñ ki añgusht-numā karte haiñ

daam meñ zulf ke 'yahyā' ko phañsāyā jab se

sau pachās aate haiñ har roz bujhā karte haiñ

muzda-e-wasl bahut din se roz suna karte hain

salaha guzre ki hum roz gina karte hain

aamad aamad ki KHabar jab se suna karte hain

kaun din hai ki nahin rah taka karte hain

nama-bar sach kaho we nama ko kya karte hain

khol kar paDhte hain ya phenk diya karte hain

ek is bazm mein hum misl-e-charagh-e-sahari

aatish-e-hijr se har raat jala karte hain

ya-rab is 'ishq mein badnam kahan tak honge

ek 'alam hain ki angusht-numa karte hain

dam mein zulf ke 'yahya' ko phansaya jab se

sau pachas aate hain har roz bujha karte hain