یہ کہو کہ کل کہاں تھے جو حضور کل نہ آئے

یہ کہو کہ کل کہاں تھے جو حضور کل نہ آئے

مگر اس طرح سے کہنا کہ جبیں پہ بل نہ آئے

مجھے جوشش جنوں میں جو خیال ہے تو یہ ہے

مرا حال زار سن کر وہ کہیں نکل نہ آئے

ادب اے جنون الفت کہ وہ مجھ سے کہہ رہی ہیں

مری آبرو بچانا کہیں اس میں بل نہ آئے

وہ مذاق عشق ہی کیا کہ جو ایک ہی طرف ہو

مری جاں مزہ تو جب ہے کہ تجھے بھی کل نہ آئے

نہ ملی جہاں میں راحت تو دھیان دل میں آیا

کہ نصیب ہم کسی سے وہیں کیوں بدل نہ آئے

نہ مرو تم ان پہ مضطرؔ کہ یہ بت ہیں چند روزہ

تم اسی خدا کو پوجو کہ جسے اجل نہ آئے