نہ مجھ کو اپنی خبر ہے نہ اپنے جی کی خبر

نہ مجھ کو اپنی خبر ہے نہ اپنے جی کی خبر

یہ حال ہے تو کہو کیا کہوں کسی کی خبر

چمن سے دور پڑا ہوں تو غم نہیں اس کا

صبا سے ملنی ہے مجھ کو کل کلی کی خبر

ہنسو نہ مرگ وفادار کی خبر سن کر

کہیں اٹھے نہ زمانہ اس ہنسی کی خبر

وفا کا حال نہ پوچھو یہ وہ زمانہ ہے

کہ آدمی نہیں لیتا ہے آدمی کی خبر

سنے جو وصل کی انسان تو کیوں نہ ہو خنداں

یہی تو ایک خبر ہے ہنسی خوشی کی خبر

یہاں تو گریہ وزاری ہجوم شوق میں ہے

وہاں سے آئی ہے مہندی کی آرسی کی خبر

کہے تو کون کہے ان سے حالِ زار مرا

سنائے کون انہیں جا کے بیکسی کی خبر

نسیمؔ کو یہی رونا ہے اب محبت میں

کہ دوستی میں نہ تھی مجھ کو دشمنی کی خبر