سوئے منزل اس طرح سے ایک دیوانہ چلا

سوئے منزل اس طرح سے ایک دیوانہ چلا

ہر قدم کچھ دیر سوچا، چپ رہا، ٹھہرا، چلا

اس میں شاید انعکاسِ چہرہ اب ممکن نہیں

حکم ہو تو توڑ دوں آئینہ کچھ دھندلا چلا

عشق میں اک بت کے کچھ اس درجہ محویت رہی

پا کے اتنی زندگی بھی یہ لگا، آیا، چلا

تشنگی کے نشہ میں تھا چور اس دم تشنہ لب

میکدہ میں جب کہ پیمانہ پہ پیمانہ چلا

میرے ہنسنے پر ہنسا، تھوڑا بہت رونے کے بعد

ایک دیوانہ مجھے لیکن بہت سمجھا چلا

التفاتِ ساقی میخانہ کی خاطر نصیرؔ

پاک دامانی کی تہمت ہر قدم دھوتا چلا