apne man par hawi ho ja

apne man par haavī ho jā

andar se bhī suufī ho jā

jo rab se bāġhī kartī hai

us duniyā se bāġhī ho jā

mar ke bhī gar zinda rahnā hai

us kī raah kī miTTī ho jā

josh pe hai fitnoñ kā tūfāñ

hazrat-e-nūh kī kashtī ho jā

hogī terī Thokar meñ duniyā

duniyā se mustaġhnī ho jā

log paḌheñge sadiyoñ tujh ko

sā'dī ban shīrāzī ho jā

chāhiye us ke pyaar kī daulat

jaisī hai us kī marzī ho jā

saare vād-vivād se uTh kar

bas mānav-tāvādī ho jā

jis se zaḳhmī ho ḳhuddārī

us pad se mustā'fī ho jā

dil meñ 'nasīr' āvāz aatī hai

sāhab-e-ishq-e-haqīqī ho jā

apne man par hawi ho ja

andar se bhi sufi ho ja

jo rab se baghi karti hai

us duniya se baghi ho ja

mar ke bhi gar zinda rahna hai

us ki rah ki miTTi ho ja

josh pe hai fitnon ka tufan

hazrat-e-nuh ki kashti ho ja

hogi teri Thokar mein duniya

duniya se mustaghni ho ja

log paDhenge sadiyon tujh ko

sa'di ban shiraazi ho ja

chahiye us ke pyar ki daulat

jaisi hai us ki marzi ho ja

sare wad-wiwad se uTh kar

bas manaw-tawadi ho ja

jis se zaKHmi ho KHuddari

us pad se musta'fi ho ja

dil mein 'nasir' aawaz aati hai

sahab-e-ishq-e-haqiqi ho ja