اپنے من پر حاوی ہو جا

اپنے من پر حاوی ہو جا

اندر سے بھی صوفی ہو جا

جو رب سے باغی کرتی ہے

اس دنیا سے باغی ہو جا

مر کے بھی گر زندہ رہنا ہے

اس کی راہ کی مٹی ہو جا

جوش پہ ہے فتنوں کا طوفاں

حضرت نوح کی کشتی ہو جا

ہوگی تیری ٹھوکر میں دنیا

دنیا سے مستغنی ہو جا

لوگ پڑھیں گے صدیوں تجھ کو

سعدی بن شیرازی ہو جا

چاہیے اس کے پیار کی دولت

جیسی ہے اس کی مرضی ہو جا

سارے واد وواد سے اٹھ کر

بس مانوتا وادی ہو جا

جس سے زخمی ہو خودداری

اس پد سے مستعفی ہو جا

دل میں نصیرؔ آواز آتی ہے

صاحب عشق حقیقی ہو جا