kHema-e-ahl-e-junun hain sar-e-sahil ab bhi

kHema-e-ahl-e-junūñ haiñ sar-e-sāhil ab bhī

haath yā sar kī sadā detā hai bātil ab bhī

us ko duniyā se ga.e ho ga.e barsoñ lekin

zinda logoñ kī jamā.at meñ hai shāmil ab bhī

chāñd kī kirnoñ ko shabnam ke tabassum ko paḌho

roz irfānī kutub hotī haiñ nāzil ab bhī

sāmne masnad-e-shāhī ke kabhī ḳham na huā

fazl-e-rabbī se mirā dil hai mirā dil ab bhī

pā ba-zanjīr huuñ hāthoñ meñ haiñ hathkaḌiyāñ magar

thartharātā hai mere sāmne qātil ab bhī

be-zamīrī kā kafan sab ne nahīñ pahnā hai

chand insāñ haiñ darindoñ ke muqābil ab bhī

kab kā manzil pe pahuñch bhī chuke sab ham-safarāñ

aur tahayyur meñ hai gum rahbar-e-manzil ab bhī

jin kī sohbat hai diloñ ke liye iksīr 'nasīr'

DhūñD to aise haiñ kuchh murshid-e-kāmil ab bhī

kHema-e-ahl-e-junun hain sar-e-sahil ab bhi

hath ya sar ki sada deta hai baatil ab bhi

us ko duniya se gae ho gae barson lekin

zinda logon ki jamaat mein hai shamil ab bhi

chand ki kirnon ko shabnam ke tabassum ko paDho

roz irfani kutub hoti hain nazil ab bhi

samne masnad-e-shahi ke kabhi KHam na hua

fazl-e-rabbi se mera dil hai mera dil ab bhi

pa ba-zanjir hun hathon mein hain hathkaDiyan magar

thartharaata hai mere samne qatil ab bhi

be-zamiri ka kafan sab ne nahin pahna hai

chand insan hain darindon ke muqabil ab bhi

kab ka manzil pe pahunch bhi chuke sab ham-safaran

aur tahayyur mein hai gum rahbar-e-manzil ab bhi

jin ki sohbat hai dilon ke liye iksir 'nasir'

DhunD to aise hain kuchh murshid-e-kaamil ab bhi