خیمۂ اہل جنوں ہیں سر ساحل اب بھی

خیمۂ اہل جنوں ہیں سر ساحل اب بھی

ہاتھ یا سر کی صدا دیتا ہے باطل اب بھی

اس کو دنیا سے گئے ہو گئے برسوں لیکن

زندہ لوگوں کی جماعت میں ہے شامل اب بھی

چاند کی کرنوں کو شبنم کے تبسم کو پڑھو

روز عرفانی کتب ہوتی ہیں نازل اب بھی

سامنے مسند شاہی کے کبھی خم نہ ہوا

فضل ربی سے مرا دل ہے مرا دل اب بھی

پا بہ زنجیر ہوں ہاتھوں میں ہیں ہتھکڑیاں مگر

تھرتھراتا ہے مرے سامنے قاتل اب بھی

بے ضمیری کا کفن سب نے نہیں پہنا ہے

چند انساں ہیں درندوں کے مقابل اب بھی

کب کا منزل پہ پہنچ بھی چکے سب ہم سفراں

اور تحیر میں ہے گم رہبر منزل اب بھی

جن کی صحبت ہے دلوں کے لئے اکسیر نصیرؔ

ڈھونڈ تو ایسے ہیں کچھ مرشد کامل اب بھی