amir-e-dauran ki bandagi ka mutalba hai

amīr-e-daurāñ kī bandagī kā mutālba hai

sanam-shikan se sanam-garī kā mutālba hai

maiñ khokhle qahqahoñ se be-zār ho chukā huuñ

jo dil se phūTī havās ḳhushī kā mutālba hai

thakā diyā hai hameñ hama-gīr ḳhvāhishoñ ne

kabhī kisī kā kabhī kisī kā mutālba hai

jo dukh to ḳhud le le sukh ko dukhiyoñ meñ baañT Daale

usī ḳhudā mast zindagī kā mutālba hai

tamām duniyā meñ ho mohabbat faqat mohabbat

yahī bas ikkīsvīñ sadī kā mutālba hai

'nasīr' rukHsār-o-zulf-o-lab ke fusūñ se niklo

miyāñ ab āfaqī-e-shā.irī kā mutālba hai

amir-e-dauran ki bandagi ka mutalba hai

sanam-shikan se sanam-gari ka mutalba hai

main khokhle qahqahon se be-zar ho chuka hun

jo dil se phuTi hawas KHushi ka mutalba hai

thaka diya hai hamein hama-gir KHwahishon ne

kabhi kisi ka kabhi kisi ka mutalba hai

jo dukh to KHud le le sukh ko dukhiyon mein banT Dale

usi KHuda mast zindagi ka mutalba hai

tamam duniya mein ho mohabbat faqat mohabbat

yahi bas ikkiswin sadi ka mutalba hai

'nasir' rukHsar-o-zulf-o-lab ke fusun se niklo

miyan ab aafaqi-e-shairi ka mutalba hai