انسان پہلے ضبط کا کچھ حوصلہ کرے

انسان پہلے ضبط کا کچھ حوصلہ کرے

پھر شوق سے حسینوں پہ دل مبتلا کرے

جھیلے غم فراق تو یہ تجربہ ہوا

کانٹے کو بھی گلوں سے نہ کوئی جدا کرے

سرگوشیاں ہیں چرخ کی بے ڈھب زمین سے

ڈر ہے نہ میرے حق میں کوئی مشورہ کرے

پہنچی ہے آج باب اثر تک کسی طرح

اب پست ہمتی نہ ہماری دعا کرے

صحت کی اس مرض کے بھلا کیا امید ہو

پرہیز جس مرض سے ہمیشہ شفا کرے

میں گرد ہوگیا تو فلک تک پہنچ گیا

پھر خاک کوئی پست مرا حوصلہ کرے

مہدی تو لینے آئیں گے وہ میری قبر پر

مدفوں مجھے کوئی تہہِ نخلِ حنا کرے

ہے دام شوق صید میں صیاد خود اسیر

جو آپ ہو پھنسا وہ مجھے قید کیا کرے

لوٹا خزاں نے آتے ہی فصلِ بہار کو

پھولا پھلا جہاں میں کوئی آکے کیا کرے

اے نشرؔ سر اٹھا کے نہ چل اس جہان میں

انسان ہے وہی جو ہمیشہ جھکا کرے