کوچہ میں تیرے بیٹھے رنج و محن سے نکلے

کوچہ میں تیرے بیٹھے رنج و محن سے نکلے

اس خاک در پہ تیرے آرام تن سے نکلے

روکھا سخن ہو اس کا دل پر نہ جس کے گذرے

کیونکر یہ درد و لذت خالی سخن سے نکلے

اخگر فشاں ہے آتش سینہ کیا عجب ہے

مرنے کے بعد میرے شعلہ کفن سے نکلے

دشنام تلخ گذرے غیروں پہ گرچہ ہم کو

ہے شہد زہر بھی جو تیرے دہن سے نکلے

اے دل ربا میں دل سے دھو بیٹھا ہاتھ اب تو

گیسو کے تیرے کیونکر پیچ و شکن سے نکلے

چشم ہرن سے کیا ہے آنکھوں کو تیری نسبت

کب وہ ادائے غمزہ چشم ہرن سے نکلے

اے نصرؔ کاش بینم روئے حبیب خود را

جان عزیز جس دم اس قید تن سے نکلے