یہ مانتا ہوں ستم آپ کا شعار نہیں

یہ مانتا ہوں ستم آپ کا شعار نہیں

مگر مجھے تو عنایت بھی ساز گار نہیں

جسے جہاں کی ہواؤں نے تاک رکھا ہے

وہ داغ دل ہے چراغِ سرِ مزار نہیں

فغاں خلاف ادب ہے میں جانتا ہوں مگر

زباں پہ زور نہیں دل پہ اختیار نہیں

یہ جوش وحشت دل یہ جنوں معاذ اللہ

یہ حال ہے گریباں میں کوئی تار نہیں

خزاں رہی تو نہ تھی میرے ذوق کے قابل

بہار ہے تو میں اب قابلِ بہار نہیں

جسے نہ یاد ہوں صحرا نوردیاں میری

تمام دشت میں ایسا تو کوئی خار نہیں

جلا کے جس نے مجھے خاک کردیا رزمیؔ

وہ نورعشق ہے شعلہ نہیں شرار نہیں