دم بھرتے ہیں سب ان کا عالم میں جداگانہ

دم بھرتے ہیں سب ان کا عالم میں جداگانہ

ہر دل کے وہ دلبر ہیں ہر جان کے جانانہ

رشتہ ہے رگ جان سے اس زلفِ معنبر کا

آشفتۂ گیسو ہوں مجنوں ہوں نہ دیوانہ

اے مہرِ درخشاں ظلمت کدۂ عالم

اے روشنیٔ کعبہ اے رونق بت خانہ

اے گوہر شہسوار گنجینۂ مخفیاً

آباد کرو آکر میرا دل ویرانہ

جن و پری و انساں حور و ملک و غلماں

اس شمع تجلی کی دن رات ہیں پروانہ

خالق ہے جو بندہ ہے سب پر ہے کرم ان کا

اپنوں کا تو کیا کہنا غیروں سے ہے یارانہ

پامال رہ الفت پاتے ہیں سر رفعت

گر چاہتا ہے عزت گر ہمت مردانہ

پوچھو نہ نثارؔ ان کے سودائی کی کیفیت

بھیدی کا تو بھیدی ہے دیوانوں کا دیوانہ