سب کھل گیا طلسم جہاں کا جو راز تھا

سب کھل گیا طلسم جہاں کا جو راز تھا

جس پردے کو اٹھایا وہی پردہ ساز تھا

محمود اسی سبب سے غلام ایاز تھا

اس بندے کے لباس میں بندہ نواز تھا

کہہ دیں جو عشقِ لیلیٰ و مجنوں کا راز تھا

پردہ کشائے روئے حقیقت مجاز تھا

شب کو عجیب یار سے راز ونیاز تھا

میں محو تھا نیاز میں وہ مست ناز تھا

آتی تھی خاکِ حضرتِ منصور سے صدا

یہ مرد سر فروش عجب سرفراز تھا

میں تھا حضورِ یار ہوئی جب اذانِ صبح

پڑھتا نماز کون کہ وقتِ نیاز تھا

اپنی شبِ فراق بسر ہوگئی نثارؔ

ایسا دراز قصۂ زلفِ دراز تھا