sansen ukhaD rahi hain mere etibar ki

sāñseñ ukhaḌ rahī haiñ mere e'tibār kī

ab ḳhatm dāstāñ ho shab-e-intizār kī

chheḌā jahāñ pe zikr qiyāmat ne yaar kā

gardish Thahar ga.ī vahīñ lail-o-nahār kī

ik ā.īna badan ke qadam chūmne lagā

āñkhoñ ko bhā ga.ī ye adā ābshār kī

kyuuñ ḳhār-o-ḳhas ko masnad-e-tauqīr kī atā

ai vaqt tuune kaisī ravish iḳhtiyār kī

dast-e-duā buland kiye hai havā-e-shab

lau thartharā rahī hai charāġh-e-mazār kī

parcham mere charāġh kī lo kar le to buland

tārīkiyoñ se karnī hai jañg ār-pār kī

bām-e-ufuq pe raushniyoñ ne kiyā tulūa

ye āḳhirī ghaḌī hai shab-e-intishār kī

tīr-o-tabar se kaam jo mumkin na ho sakā

vo kaam kar ga.ī tirī chuTkī ġhubār kī

sāñseñ sulagte jalte hue dasht kī thamīñ

raftār dekh kar mere naaqa savār kī

kāġhaz ne mere sāmne aakar kiyā qiyām

chheḌī jo baat kHāma-e-manzar-nigār kī

ai 'nūr' us ko dekh ke mahsūs ye huā

tasvīr maiñ ne dekhī hai mauj-e-bahār kī

sansen ukhaD rahi hain mere e'tibar ki

ab KHatm dastan ho shab-e-intizar ki

chheDa jahan pe zikr qiyamat ne yar ka

gardish Thahar gai wahin lail-o-nahaar ki

ek aaina badan ke qadam chumne laga

aankhon ko bha gai ye ada aabshaar ki

kyun KHar-o-KHas ko masnad-e-tauqir ki ata

ai waqt tune kaisi rawish iKHtiyar ki

dast-e-dua buland kiye hai hawa-e-shab

lau tharthara rahi hai charagh-e-mazar ki

parcham mere charagh ki lo kar le to buland

tarikiyon se karni hai jang aar-par ki

baam-e-ufuq pe raushniyon ne kiya tulua

ye aaKHiri ghaDi hai shab-e-intishaar ki

tir-o-tabar se kaam jo mumkin na ho saka

wo kaam kar gai teri chuTki ghubar ki

sansen sulagte jalte hue dasht ki thamin

raftar dekh kar mere naqa sawar ki

kaghaz ne mere samne aakar kiya qiyam

chheDi jo baat kHama-e-manzar-nigar ki

ai 'nur' us ko dekh ke mahsus ye hua

taswir main ne dekhi hai mauj-e-bahaar ki