دیا ساقی نے اول روز وہ پیمانہ مستی میں

دیا ساقی نے اول روز وہ پیمانہ مستی میں

کہ میں نا آشنا پیکر ہوا دیوانہ مستی میں

مری پوجا تھی کیف انگیز نظروں کی پرستاری

مرا سجدہ تھا پیش ابروئے جانانہ مستی میں

شراب آتشیں وہ ہے کہ دو اک گھونٹ پیتے ہی

جو ساقی ہو تو آتا ہے نظر پیمانہ مستی میں

کوئی کہتا ہے مسجد ہے کوئی کہتا ہے باہر جا

الٰہی کیا میں بھولا ہوں رہ مے خانہ مستی میں

نظر آتا ہے مجھ کو بوریا بھی تخت طاؤسی

گدا رکھتا ہے گویا سطوت شاہانہ مستی میں

نشہ تھا مجھ کو اور یاروں نے چاہا چھین لیں بوتل

مگر کام آ گئی کچھ جرأت رندانہ مستی میں

خبر کیا تھی کہ واعظ ہے یہی سمجھا کہ ساقی ہے

اٹھا اور اٹھ کے جا لپٹا میں بے تابانہ مستی میں

قدم رکھتا کہیں ہوں اور پڑتا ہے کہیں جا کر

نشورؔ اس وقت ہوں کچھ ہوش سے بیگانہ مستی میں