مجھے کوئی جام نہ دے اگر، مرے ساقیا مجھے غم نہیں

مجھے کوئی جام نہ دے اگر، مرے ساقیا مجھے غم نہیں

مجھے صرف اتنا ملال ہے کہ وہ تیری چشمِ کرم نہیں

ہے حقیقتاً وہی زندگی، ترے غم سے ہو جسے واسطہ

جسے راس آیا نہ غم ترا، وہ حیات موت سے کم نہیں

مرے ہم نشیں مرے ہم نوا، مجھے اب فریبِ سکوں نہ دے

ترے غم میں ایسا مزہ ملا، کہ اب آرزوئے کرم نہیں

جہاں دل سے سر کو جھکا دیا وہیں ایک کعبہ بنا دیا

مری بندگی ہے وہ بندگی جو رہینِ دیرو حرم نہیں

جو پیامؔ دل سے قریب تھے جو بہت ہی مجھ کو عزیز تھے

انہیں دوستوں کا یہ حال ہے کہ وہی شریکِ الم نہیں