रुख़ का सौदा है कफ़न तक धज्जियाँ हो जाएगा

رخ کا سودا ہے کفن تک دھجیاں ہوجائے گا

چاند کے پرتو سے یہ جامہ کتاں ہوجائے گا

ٹانکے ٹوٹیں گے تو آئے گی صدائے الفراق

زخم بو لے گا تو شور الاماں ہوجائے گا

میرے جلنے سے کھلے گا راز گریہ خلق پر

اٹھ کے کہرا سوزش دل کا دھواں ہوجائے گا

کیوں عبث پھرتا ہے ہم رندوں کے سر پر رات دن

ٹوکرا بدنامیوں کا آسماں ہوجائے گا

جوش زن ہوتا رہے گا تا لحد دریائے خوں

نخل تابوت شہیداں ارغواں ہوجائے گا

تیرے قیدی کو ملے تو پاؤں دھرنے کی جگہ

سنگ مقناطیس سنگ آستاں ہوجائے گا

خود تمہیں یہ چاند سا مکھڑا کرے گا با حجاب

منہ پہ جب مارو گے تم جھڑمٹ کتاں ہوجائے گا

سر پر چھن چھن کر بلائیں آئیں گی خاموش قدرؔ

آہ کھینچو گے تو چھلنی آسماں ہوجائے گا