miTaya uf qamar se naujawan ko

miTāyā uf qamar se naujavāñ ko

na aayā rahm marg-e-nā-gihāñ ko

machaltā hai to machle dil ye kambaḳht

kahāñ se lā.ūñ yād-e-dilsitāñ ko

banāyā siina ko yādoñ se gulshan

ḳhudā rakhe hamāre bāġhbāñ ko

kiyā vā'da magar phir bhī na aayā

ḳhudā samjhe but-e-nā-mehrabāñ ko

huī ġhā.eb kahāñ dil se nikal kar

asar bhī DhūñDhtā hai ḳhud fuġhāñ ko

ajal se maut bolī ye dam-e-naza’

ki kis par chhoḌ jā۔ūñ us makāñ ko

tumhārā chāhne vaalā hai shāyad

'adāvat kyuuñ hai mujh se āsmāñ ko

havās aise ga.e sub.h shab-e-vasl

ki ham but ban ga.e sun kar azaañ ko

kahīñ us kā Thikāna hī nahīñ hai

liye jaao dil-e-be-ḳhānamāñ ko

biThā kar us galī meñ zo'f bolā

na uThne dūñgā ab is nā-tavāñ ko

'qamar' bhopal meñ aa.e haiñ 'afsos'

sunāo she'r aise qadar-dāñ ko

miTaya uf qamar se naujawan ko

na aaya rahm marg-e-na-gihan ko

machalta hai to machle dil ye kambaKHt

kahan se laun yaad-e-dilsitan ko

banaya sina ko yaadon se gulshan

KHuda rakhe hamare baghban ko

kiya wa'da magar phir bhi na aaya

KHuda samjhe but-e-na-mehraban ko

hui ghaeb kahan dil se nikal kar

asar bhi DhunDhta hai KHud fughan ko

ajal se maut boli ye dam-e-naza’

ki kis par chhoD ja۔un us makan ko

tumhaara chahne wala hai shayad

'adawat kyun hai mujh se aasman ko

hawas aise gae subh shab-e-wasl

ki hum but ban gae sun kar azan ko

kahin us ka Thikana hi nahin hai

liye jao dil-e-be-KHanaman ko

biTha kar us gali mein zo'f bola

na uThne dunga ab is na-tawan ko

'qamar' bhopal mein aae hain 'afsos'

sunao she'r aise qadar-dan ko