مٹایا اف قمر سے نوجواں کو

مٹایا اف قمر سے نوجواں کو

نہ آیا رحم مرگِ نا گہاں کو

مچلتا ہے تو مچلے دل پہ کمبخت

کہاں سے لاؤں یاد دلستاں کو

بنایا سینہ کو یادوں سے گلشن

خدا رکھے ہمارے باغباں کو

کیا وعدہ مگر پھر بھی نہ آیا

خدا سمجھے بتِ نامہرباں کو

ہوئی غائب کہاں دل سے نکل کر

اثر بھی ڈھونڈتا ہے خود فغاں کو

اجل سے موت بولی یہ دمِ نزع

کہ کس پر چھوڑ جاؤں اس مکاں کو

تمہارا چاہنے والا ہے شاید

عداوت کیوں ہے مجھ سے آسماں کو

حواس ایسے گئے صبح شب وصل

کہ ہم بت بن گئے سن کر اذاں کو

کہیں اس کا ٹھکانہ ہی نہیں ہے

لئے جاؤ دل بے خانماں کو

بٹھاکر اس گلی میں ضعف بولا

نہ اٹھنے دوں گا اب اس ناتواں کو

قمرؔبھوپال میں آئے ہیں افسوسؔ

سناؤ شعر ایسے قدر داں کو