کب تک زبان ضبط فغاں اے خدا کرے

کب تک زبان ضبط فغاں اے خدا کرے

کہہ دوں تو دردِ دل کی شکایت کیا کرے

مانا کہ قصد قتل وہ نازک ادا کرے

مشکل جو آڑے آئے تو کیوں کر روا کرے

لڑکوں کا کھیل ہے کہ گھروندا ہے جسم زار

قسمت میں جس کے لکھا ہو بن کر مٹا کرے

ہجر بتاں میں نکلے جو اک رات دل سے آہ

برسوں سریر عشق معلیٰ ہلا کرے

اس بت سے مانا دل کو وفا کی نہیں امید

اتنا تو ہو کہ خالی تسلی دیا کرے

صیاد آج لے گا اسیروں کا جائزہ

دیکھیں قفس ملے کسے کس کو رہا کرے

شاہنشہِ نجف کی نہیں انتہائے مدح

اللہ مدح خواں ہے بشر کیا ثنا کرے

جو ہونے والی بات ہے وہ ہوکے رہتی ہے

قاسمؔ ستم کا شکوہ ستمگر سے کیا کرے