بہک کر جب کوئی زاہد سوئے میخانہ آتا ہے
بہک کر جب کوئی زاہد سوئے میخانہ آتا ہے
ابل پڑتا ہے شیشہ رقص میں پیمانہ آتا ہے
کبھی ابرو کو جنبش ہے کبھی آنکھیں لڑاتے ہیں
کبھی تلوار چلتی ہے کبھی پیمانہ آتا ہے
خیال آتا ہے جب پیر مغاں کی چشم میگوں کا
پری کی طرح اڑ کر سامنے پیمانہ آتا ہے
خلش دل میں جگر میں ٹیس لب پر آہ آنکھیں تر
کوئی تصویر غم ہے یا ترا دیوانہ آتا ہے
بہار آتے ہی ہوگا زیب تن ملبوس عریانی
جنو ں ہمراہ لےکر خلعتِ شاہانہ آتا ہے
جنوں میں آبروئے عشق ہے ہر داغ سینے کا
محبت ہو جو صادق تمغۂ شاہانہ آتا ہے
کوئی قاش جگر یا دل کا ٹکڑا ہے قتیلؔ اس میں
خدا معلوم کیا اشکوں میں بیتابانہ آتا ہے
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
