اتنا نہ فریبِ الفت میں یہ جذبۂ کامل آجائے

اتنا نہ فریبِ الفت میں یہ جذبۂ کامل آجائے

ہر گام قریبِ منزل ہو ہر گام پہ منزل آجائے

جلوؤں کی نمائش ہے اس میں خود ان کی رہائش ہے اس میں

اب وادیٔ ایمن سے کہہ دو اس دل کے مقابل آجائے

اتنی تو عطا ہوجانیں اتنے تو عطا ہوں دل مجھ کو

ہر ناز پہ اک جاں قرباں ہو ہر غمزے پہ اک دل آجائے

یہ تیری نظر کی رنگینی یہ تیرے قدم کی رعنائی

جس رنگ پہ ساقی تو چاہے اس رنگ پہ محفل آجائے

بیدادِ محبت کا اے دل محشر میں مزا آجائے گا

اک سمت سے میں ہوں دادِ طلب اک سمت سے قاتل آجائے

اے خضر کسی نے دنیا میں ایسا بھی سفینہ دیکھا ہے

ہر موج سے ساحل پیدا ہو ہر موج میں ساحل آجائے

اے عشق کی وسعت کیا کہنا اے شوقِ شہادت کیا کہنا

قاتل ہی تڑپ کر مقتل میں خود صورتِ بسمل آجائے