آرزو ہے جب مرے قالب سے رخصت جان ہو

آرزو ہے جب مرے قالب سے رخصت جان ہو

وردِ لب نامِ نبی دل میں خدا کا دھیان ہو

دل تصدق جان صدقے یا نبی روحی فداک

تو ہو میرا دل ہو تیرا غم ہو میری جان ہو

موت برحق ہے ضرور آئےگی گھر ہو یا سفر

ہاں مدینے میں اگر آ جائے تو احسان ہو

میرا جینا میرا مرنا ہے تمہیں پر منحصر

روح کی روحِ رواں تم جان کی تم جان ہو

دل کی دل ہی میں رہے دل کی تمنا ہے یہی

تم مرے دل کی تمنا تم مرے ارمان ہو

ہجر مولیٰ میں نکلتا ہے بڑی مشکل سے دم

دم نکل جائے تو یہ مشکل بڑی آسان ہو

چشم و دل ہیں گھر تمہارے شوق سے بیٹھو اٹھو

کوئی کس منہ سے یہ کہہ سکتا ہے تم مہمان ہو

جان ہم تم سے چرائیں گے ہماری جان کیا

تم ہماری جان کیا ہو جان کی بھی جان ہو

منزلیں طیبہ کی طے ہوں یہ ہیں باتیں دور کی

پہلے اے دل گھر سے چلنے کا تو کچھ سامان ہو

جب سفر کرتے ہیں پہلے ڈھونڈلیتے ہیں رفیق

ہم ابھی چل دیں عدم کو ساتھ اگر ایمان ہو

کاش دے دے سجدۂ در آپ کا داغِ جبیں

روزِ محشر ہم غلاموں کی یہی پہچان ہو

دل وہ پیارا جان سے بھی جو فدا ہو آپ پر

جان پیاری ہے وہی جو آپ پر قربان ہو

وہ سرہانے لائے ہیں تشریف میں ہوں جاں بلب

اٹھوں اور اٹھ کر فدا ہو جاؤں اتنی جان ہو

دم گھٹا جاتا ہے میرا تنگنائے دہر میں

میری وحشت کو بڑا سا حشر کا میدان ہو

کاش وہ دن ہو کہ حافظؔ ہو طلب دربار میں

نذر کرنے کو یہ چوتھا نعت کا دیوان ہو