ہوشیار اس راہ میں دیوانہ ہے

ہوشیار اس راہ میں دیوانہ ہے

ہے جو دیوانہ وہی فرزانہ ہے

اک جہاں جس کے لیے دیوانہ ہے

اس پری سے آج کل یارانہ ہے

زلف پیچاں دام ہے اور خال رخ

مرغ دل کے واسطے اک دانہ ہے

جلوہ فرما ہے جہاں وہ گلبدن

رشک گلزار ارم وہ خانہ ہے

شاخیں گل کی جھومتی ہیں آج کیوں

عازم گلشن کوئی مستانہ ہے

اس بت کافر نے دل میں گھر کیا

دل ہمارا آج کل بت خانہ ہے

نامہ اوڑ کر جائے گا خود یار تک

مندرج جو حال بیتا بانہ ہے

مشتری اس مہروش کے ہم ہوئے

نقد دل جس کے لیے بیعانہ ہے

اس پری کا کیا تو ہم سایہ ہوا

کیوں مظاہرؔ آج کل دیوانہ ہے