کبھی نظارہ تو حاصل ہوا مری جاں ترا

کبھی نظارہ تو حاصل ہوا مری جاں ترا

غم نہیں دشمن جان پھر ہو جو درباں ترا

ایک مدت سے مرے دل میں ہے ارماں تیرا

اب تو ہو وصل کسی طرح مری جاں تیرا

پھر ہے رونا وہی اے دیدۂ گریاں تیرا

دیکھوں اس مرتبہ کیا کرتا ہے طوفاں تیرا

مہر تاباں سے ہے بڑھ کر رخ تاباں تیرا

نازکرتا ہے بجا حسن پر اے جاں تیرا

کون اٹھایا کرے صدمہ شب ہجراں تیرا

اب وہیں ہوگا مرے ہاتھ میں داماں تیرا

ہر گھڑی جب ہے یہی اشک فشانی میری

کیا مداوا میں کروں دیدۂ گریاں تیرا

دل کو لیلیٰ کے ہے محمل میں بہت بیتابی

قیس کیا آ گیا نزدیک بیاباں تیرا

کیا مزا اس کا اٹھائیں گے مرے زخم جگر

یار خالی ہے ابھی سے جو نمکدان تیرا

کب سے تھی وصل کی حسرت تیرے دل میں اے نجمؔ

اب تو مہماں ہوا وہ مہ تاباں تیرا