چاندنی میں جو دکھاتا رخ تاباں کوئی

چاندنی میں جو دکھاتا رخ تاباں کوئی

دیکھتا سوئے فلک ہو کے نہ حیراں کوئی

انبیا کہتے تھے معراج میں اللہ کی شان

ہم نے اس شکل کا دیکھا نہیں انساں کوئی

جس قدر مجھ کو ستانا ہے ستا لے گردوں

دیکھ رہ جائے نہ باقی ترا ارماں کوئی

وہ دم نزع جو آئے تو یہ کہتے آئے

ساتھ لے جائے نہ اپنے مرا ارماں کوئی

آپ کے ہونٹھوں کا سرخی سے نہ ہوتا جو گماں

خواہش لعل میں جاتا نہ بدخشاں کوئی

یار کے دست حنائی سے ملائیں کس کو

ایسا خوش رنگ کہاں پنجۂ مرجاں کوئی

دھوم اس ملک سخن میں ہے تمہاری اے نجمؔ

ہمسری کر نہیں سکتا ہے سخن داں کوئی