بنے وہ بیوفا دشمن ہمارا

بنے وہ بیوفا دشمن ہمارا

فدا ہو جس پہ جان و تن ہمارا

نہیں دشمن کو رکھتا دوست کوئی

ہمارا دوست ہے دشمن ہمارا

کہاں قسمت کہاں ایسا مقدر

کہ کوئے یار ہو مسکن ہمارا

متاعِ صبر لوٹی راہ چلتے

ترا گیسو ہوا رہزن ہمارا

نہیں یہ قلبِ ماہیت تو کیا ہے

کہ پھر ہو یار وہ پر فن ہمارا

اٹھیں ہم روٹھ کر مجلس سے اس کی

وہ کھینچے پیار سے دامن ہمارا

حیاتِ جاوداں پائیں جمالیؔ

جو ہو اس کی گلی مدفن ہمارا