نئی ہر دم ستمگاری تو دیکھو

نئی ہر دم ستمگاری تو دیکھو

بت عیار کی یاری تو دیکھو

مجھی سے کرتے ہیں تعریف اغیار

یہ عیاروں کی عیاری تو دیکھو

وفاداروں پہ تم نے کی جفائیں

ذرا اپنی وفاداری تو دیکھو

ہوا آہوں سے اپنی چرخ غربال

ان آہوں کی شرر باری تو دیکھو

نہ دیکھو اپنی بے رحمت کو کچھ تم

مگر میری دل افگاری تو دیکھو

برا کہہ کر مجھے، ان کو کیا خوش

مرے قاصد کی مکاری تو دیکھو

جمالیؔ سا سیہ نامہ ہو مغفور

خدا کی شانِ غفاری تو دیکھو