رلا رلا کر جلا جلا کر فنا کرے گی جدائی تیری

رلا رلا کر جلا جلا کر فنا کرے گی جدائی تیری

کسی بھی در کا نہیں رکھے گی یقین ہے آشنائی تیری

میں کب فدا تجھ پہ جان کرتا، میں کیوں تیری جستجو میں مرتا

کبھی نہ اس راہ سے گذرتا جو جانتا بیوفائی تیری

فسانۂ غم کسے سناؤں، جراحت دل کسے دکھاؤں

بھلا میں اب کس سے داد چاہوں خدا بھی تیرا خدائی تیری

پری پہ دل آئے کیوں کسی کا ہو حور و غلماں پہ کون شیدا

نہیں دو عالم میں مثل جس کا وہ حق نے صورت بنائی تیری

نہ کنہ تیری کسی نے جانی، تو ہی ہے اپنا نظیر و ثانی

کہاں سے لاؤں وہ لفظ و معنی بیاں ہو جن سے بڑائی تیری

ہے خاک در کی تری وہ سرمہ، ہو چشم بے نور جس سے بینا

ہے شیر تیری گلی کا کتا ہے بادشاہی گدائی تیری

نہ تیرا احساں ہے اک مجھی پر نہ صرف اسی خلق کا تو سرور

جلیں فرشتوں کے پر جہاں پر وہاں بھی دیکھی رسائی تیری

جمالیؔ اس کی گلی میں مت جا اگر نہ مانے گا میرا کہنا

تو بس یقیناً یہ جان لینا کہ بے اجل موت آئی تیری