عرش ہو یا کہ فرش ہو نور ترا کہاں نہیں

عرش ہو یا کہ فرش ہو نور ترا کہاں نہیں

دونوں جہاں کی روشنی پھر بھی کہیں نشاں نہیں

چشم بصیر چاہیے نور ترا کہاں نہیں

سجدۂ شوق کے لیے حاجتِ آستاں نہیں

تجھ سے کریم سے سوال کیوں نہ کروں میں بار بار

تری نظر بدلنے کا وہم نہیں گماں نہیں

قلب ملول کو لیے جاؤں تو جاؤں میں کہاں

ایسی زمیں بھی کوئی ہے جس پہ کہ آسماں نہیں

حالتِ چشم زار سے پردہ یہ پردہ ہے عیاں

اہلِ نظر کی آنکھ سے رازدلی نہاں نہیں

کاوشِ غم بتاؤں کیا سوزِ الم جتاؤں کیا

کوئی بھی ہم نفس نہیں کوئی بھی ہم زباں نہیں

پاسِ وفا کے میں فدا ضبط الم کے میں نثار

لب پہ شبِ فراق بھی آہ نہیں فغاں نہیں

کیا کہوں دل کی سرگزشت دل ہے اور اضطراب ہے

دل کو ہے اس سے سابقہ دل پہ جو مہرباں نہیں

تو جو کہے وہ سب درست میں جو کہوں وہ سب غلط

تری زباں زبان ہے میرا بیاں بیاں نہیں

جلوہ فروز چشم شوق کچھ نہں غیر حسن و عشق

ایسی فضا میں ہوں جہاں سر نہیں آستاں نہیں

سینے پہ ہاتھ رکھ کے آپ دیکھ لو آئے ہو اگر

دل میں کہاں کہاں ہے درد اور کہاں کہاں نہیں

دل میں کوئی اُمید بھی آئے تو آئے کس طرح

مجھ کو ہے اس سے سابقہ جس کی زباں پہ ہاں نہیں

قدسیؔ خوش نصیب ہے بندہ اسی کریم کا

جس کے کرم کی کوئی حد تا بہ حدِ بیاں نہیں