فقط اتنی سی دل کی داستاں ہے

فقط اتنی سی دل کی داستاں ہے

کسی کا نام ہے اپنی زباں ہے

میں کیوں سمجھوں کہ محنت رایگاں ہے

مرا سر ہے تمہارا آستاں ہے

کہی جاتی نہیں حالت زباں سے

یہی مجبور غم کی داستاں ہے

ہوائیں دہر کی بدلی ہوئی ہیں

کسی مجبور غم کا امتحاں ہے

تڑپ جاتا ہے جب سنتا ہے کوئی

خداوندا یہ کس کی داستاں ہے

مجھے غربت میں بھی تنہا نہ سمجھو

مرے ہمراہ یادِ کارواں ہے

نشاطِ عمر رفتہ یار کیا آئے

کہ اک بھولی ہوئی سی داستاں ہے

میں اپنے ہاتھ سے دل کھو چکا ہوں

نگاہِ ناز بتلائے کہاں ہے

اسیرِ غم کی بیتابی نہ پوچھو

قفس کے سامنے ہی آشیاں ہے

یہ ربطِ حسن و عشق اللہ اللہ

مرا قصہ تمہاری داستاں ہے

کسی سے جب سنا افسانۂ غم

تو میں سمجھا یہ میری داستاں ہے

جسے دل جانتا ہے دشمن جاں

وہی بیداد گر آرام جاں ہے

ارادہ کیا کروں کوئے صنم کا

وہاں کی توزمیں بھی آسماں ہے

ہوا و باغبان و برق و صیاد

عدو اتنے ہیں اور ایک آشیاں ہے

ہمارا چار تنکوں کا نشیمن

دلِ گلچیں پہ کس درجہ گراں ہے

نشاں مفقود ہے جس بے نشاں کا

جہاں دیکھو وہیں وہ بے نشاں ہے

نہ ڈھونڈ ھو قدسیؔ آشفتہ سر کو

جہاں میں اب وہ سودائی کہاں ہے