tumhin ho raazdar-e-kun-fakan mahbub-e-subhani

tumhīñ ho rāzdār-e-kun-fakāñ mahbūb-e-sub.hānī

tumhārī ik nazar hai parda-dār-e-nazm-e-imkānī

sarāsar shakl-e-nūrānī mujassam nūr-e-yazdānī

tumhīñ ko zeb detī hai ḳhudā-jūī ḳhudā-shānī

ḳhudā ko tum ne pahchānā ḳhudā ko tum ne batlāyā

sifat ko zaat se jaanā sifat se zaat pahchānī

mujhe kyā Dūbne kā ḳhauf mere nāḳhudā vo haiñ

mujhe kyuuñ chheḌtī hai tū yam-e-'isyāñ kī tuġhyānī

jo dīvāna ho ik zulf-e-pareshān-e-mohammad kā

na kyuuñ sad ġhairat taskīñ ho phir us kī pareshānī

nihāñ hai ātish-e-'ishq-e-mohammad mere siina meñ

harīm dil meñ raushan hai 'ajab ik sham'-e-nūrānī

na jaa.eñ farsh se phir 'arsh par rūh-ul-amīñ hargiz

jo mil jaa.e unheñ sultān-e-taiba kī magas-rānī

guzar hai us jagah terā rasā.ī hai vahāñ terī

jahāñ par ḳhatm ho jaatī hai jākar hadd-e-imkānī

ḳhudā kā aur mahbūb-e-ḳhudā kā nām-levā huuñ

na hal ho jaa.e kyuuñ 'ārif' mirī mushkil ba-āsānī

tumhin ho raazdar-e-kun-fakan mahbub-e-subhani

tumhaari ek nazar hai parda-dar-e-nazm-e-imkani

sarasar shakl-e-nurani mujassam nur-e-yazdani

tumhin ko zeb deti hai KHuda-jui KHuda-shani

KHuda ko tum ne pahchana KHuda ko tum ne batlaya

sifat ko zat se jaana sifat se zat pahchani

mujhe kya Dubne ka KHauf mere naKHuda wo hain

mujhe kyun chheDti hai tu yam-e-'isyan ki tughyani

jo diwana ho ek zulf-e-pareshan-e-mohammad ka

na kyun sad ghairat taskin ho phir us ki pareshani

nihan hai aatish-e-'ishq-e-mohammad mere sina mein

harim dil mein raushan hai 'ajab ek sham'-e-nurani

na jaen farsh se phir 'arsh par ruh-ul-amin hargiz

jo mil jae unhen sultan-e-taiba ki magas-rani

guzar hai us jagah tera rasai hai wahan teri

jahan par KHatm ho jati hai jakar hadd-e-imkani

KHuda ka aur mahbub-e-KHuda ka nam-lewa hun

na hal ho jae kyun 'arif' meri mushkil ba-asani